HAPIT ma-double dead sila Judge Natividad sa Samar, PO3 Filomeno Toronia sa Digos Police Station ug Jolo Mayor Tulawie nga pila na ka mga tuig nga namatay.
Naapil sila sa listahan sa 159 nga mga opisyales nga protektor kuno sa illegal drugs nga gibasa ni Presidente Duterte niadtong Agosto 7.
Makauulaw nga maapil sa listahan. Pero mas kuyaw kuno kay ang naa sa lista mga “walking dead” kay target na sa mga vigilantes group.
Ubay-ubay pa ang mga sayop sa lista. Apil pud sa lista ang mga na dismissed na sa puesto (Judge Mupas), retired na (Judge Rene Gonzales) o dili na opisyal sa gobierno (former Mayor Marjorie Apil Salazar ug former Mayor Felix Castillo).
Kinsay naghimo sa lista nga mihatag ug sayop ug karaang impormasyon sa atong presidente?
Ingon ni Police Chief Ronald de la Rosa o Chief Bato, ang maong listahan nakalap sa usa ka workshop nga giapilan sa mga intelligence officials sa atong kapulisan.
Pastilan! Mga intelligence?
Sa usa ka bahin, pirmi nabalita ang kill list sama sa gihimo sa Inquirer. Sumala sa listahan sa mga nangamatay sa drug war, sukad sa Hulyo 1 hangtod sa Agosto 9, dili mu menos sa 681 ang napatay nga mga suspected nga drug pushers.
Pastilan! Ngilngig no? Kay buot ipasabot, mga 17 ang napatay sa matag adlaw.
Mga 449 ang napatay sa mga police operations ug 232 ang napatay sa vigilante-style, labi na sa gitawag ug riding in tandem. Sa ato pa, kada tulo nga napatay, duha ang napatay sa mga pulis ug usa sa mga vigilantes.
Ngilngig kay dili diay simple lang kining drug war. (Ug wars diay kini)
Ang usa ka giyera mao ang sa atong kapulisan batok sa mga drug pushers ug drug lords. Sa vigilante-style nga pagpatay, maingon nga may tulo ka mga giyera — ang giyera sa mga pushers batok sa ilang kauban sa syndikato (aron way makapilaik o tungod sa onsehay?), giyera sa mga vigilante batok sa mga pushers, giyera sa mga police scalawags aron mahilom ang assets nga mobisto nila.
Sa suma total, angay nga duha ra ka giyera. Ang giyera sa kapulisan batok sa mga drug pushers ug ang giyera sa kapulisan batok sa mipatay sa mga drug pushers (mga police scalawags, mga drug syndicates, vigilantes) kay binuhatan pud kini sa mga kriminal.
Pero pastilan! Ang vigilante killing gidasig ba sa mga pulis?
Kung dili, gamata lang sila ug buntag?
Sa mga nangaging katuigan, ubay ubay na pud ang napatay sa mga riding in tandem nga wa pa jud masolbad hangtod karon.
Unsaon pag menos ug pagsolbad sa pagpatay nga vigilante-style? Unsaon na lang kung tungod sa sayop nga intelligence, naapil sa lista ang way sala ug napatay?
Pastilan! Bisag usa ra ang sayop, it is one too many.
Ang Pastilan ni Miner Generalao ay mababasa tuwing Miyerkules. Para sa komento o katanungan, i-text ang pangalan, edad, lugar at mensahe sa 09163025071 09999858606.