MEDYO mataba pa ngayon si Judy Ann Santos kaya mukhang matatagalan pa bago siya uli sumabak sa paggawa ng teleserye. Pero aniya, tuluy-tuloy naman ang ginagawa niyang pagpapapayat sa tulong ng kanyang asawang si Ryan Agoncillo.
Inamin naman ni Juday na nakaramdam siya ng insecurities dahil sa katawan niya ngayon matapos ipanganak ang kanilang bunsong si Luna.
“May mga moments pa rin talaga na yung physical appearance mo ay makakaapekto sa ‘yo. Hindi ako magsisinungaling do’n sa thought na hindi ko naiisip na bakit ako ganito (kataba). Tao lang ako, nai-insecure ako, minsan napu-frustrate ako.
“But I’m so happy na my husband is very, very supportive. Talagang napaka-supportive ni Ryan sa akin pagdating sa workout, pagkain, ano siya, parang sexy pa rin ako sa paningin niya,” natatawang chika pa ng aktres sa isang panayam.
Natanong si Juday kung balak pa nilang sundan uli si Luna, “Hindi pa puwede, under renovation pa ang reproductive system. Ha-hahaha! Kailangan pang magpahinga, but in God’s will bigyan pa kami ng isa pa, hindi naman ako magrereklamo, bakit naman hindi.
“Pero pag dumating siguro ako ng mga 45 at hindi pa uli, okey na okey na kami sa tatlo,” chika pa ng misis ni Ryan.