ITINANGGI ng kampo ni dating pangulong Benigno “Noynoy” Aquino III na inisnab niya si dating pangulo at ngayon ay Pampanga Rep. Gloria Macapagal-Arroyo matapos magkaharap sa Malacanang nang kapwa dumalo sa ipinatawag na National Security Council (NSC) ni Pangulong Rodrigo Duterte.
Sinabi ng source na tumanggi nang magpakilala na tapos na ang ibinigay na photo opportunity para sa mga cameraman at photographer nang tangkaing batiin ni Aquino si Arroyo.
“Di totoong inisnab ni PNoy si GMA. si PNoy pa ang nag-hi kay GMA sa NSC. Sila-sila na lang, mga presidente at opisyal ang naroon. Nung nag-hi si PNoy, di siya kinibo ni GMA. Parang asiwa pa ang mukha,” sabi ng source.
Nauna nang iniulat na dinedma ni Aquino si Arroyo matapos dumating sa Palasyo at makipagkamay sa mga dating pangulo ng bansa at kay Duterte.
Matatandaang sa administrasyon ni Aquino isinulong ang mga kasong plunder laban kay Arroyo at na-hospital arrest pa ito ng mahigit apat na taon.