NAGING emosyonal ang mensaheng ipinost ni Maine Mendoza sa kanyang Instagram account para sa kanyang mga tagasuporta na nakisaya sa kanyang first anniversary sa showbiz na ginanap sa Eat Bulaga last Saturday.
Dito sinabi ni Maine na napakarami niyang realizations pagkatapos ng isang taong pagbibigay saya sa mga Dabarkads at sa AlDub Nation kasama ang kanyang ka-loveteam na si Alden Richards. Narito ang kabuuan ng caption na inilagay ni Yaya Dub sa isa niyang litrato na kuha sa malaking logo ng Eat Bulaga.
“Isang araw lamang ang naibigay sakin para aralin lahat ng ginawa ko kanina. (Dahil sa kakulangan ng oras) Mababaliw na ata ako kahapon kakaisip ng mga gagawin ko hanggang sa susunod na linggo. “Naloka ako; parang naisip ko ‘Kaya ko pa ba?’, sabi ko pa ‘Bakit kailangan pang icelebrate yung anniversary ko? Di ba pwedeng simpleng bati nalang?’ hanggang sa ipinaliwanag nila sa akin kung bakit kailangang ipagdiwang itong araw na to.
“Naintindihan ko. Itong araw na to ay hindi lang para sakin; kundi para din sa lahat ng nagmamahal at sumusuporta sa akin. Sa mga sumubaybay sa akin mula simula hanggang ngayon; sa mga patuloy na naniniwala–para sa mga hindi nawala. Itong araw na ito at ang lahat ng ginawa ko kanina ay para ho sa inyo.
“Isang taon na ang lumipas at nasaksihan niyo ang lahat ng pagbabago sa buhay ko–maliit man o malaki–kayo ay nakatutok. Gusto kong magpasalamat sa lahat; sa mga sumusuporta, naniniwala, nagtitiwala at patuloy na nagmamahal. Ngayon alam ko na ang sagot sa mga katanungan ko; kung bakit nga ba ako inilagay ng Diyos dito sa kinatatayuan ko. “Hindi lang pala ito basta-basta katuparan lamang ng pangarap ko…siguro kaya din ako nandirito ay dahil alam Niya na sa mga simpleng bagay na ginagawa ko ay mayroon akong mapapaligayang mga tao.”