KINAPOS man sa hangaring makakuha ng back-to-back NBA titles, napanatili naman ni league reigning MVP Stephen Curry ang No. 1 spot pagdating sa jersey sales.
Inilabas kahapon ng NBA Store ang estadistika base sa pinakabagong jersey sales results mula Abril hanggang Hunyo.
Ang top 15 jersey sales (ayon sa ranggo) ay binubuo nina Curry, LeBron James, Kobe Bryant, Kyrie Irving, Klay Thompson, Russell Westbrook, Draymond Green, Kevin Durant, Kawhi Leonard, Derrick Rose, Tim Duncan, Dwyane Wade, Damian Lillard, Andre Iguodala at Kristaps Porzingis.
Mula sa pagtatapos ng 2014-15 season, hinawakan ni Curry ang No. 1 spot sa listahan ng pinakapopular na jersey habang ang nakatunggali nito sa 2016 NBA Finals na si James ay lumapag sa ikalawang puwesto.
Ang kareretirong Los Angeles Lakers guard na si Bryant ay nanatiling sikat pa rin matapos malagay sa No. 3 spot habang ang kakampi ni James na si Irving ay nasa ikaapat na puwesto.
Maliban kay Curry, may tatlong miyembro ng Golden State Warriors ang nakapasok sa top 15 at ito ay kinabibilangan nina Thompson, Green at Iguodala na nasa ikalima, ikapito at ika-14 puwesto, ayon sa pagkakasunod.
Ang kanilang bagong kakampi sa Golden State at dating Oklahoma City Thunder forward na si Durant ay nasa ikawalong puwesto.
Ang international rookie sensation na si New York Knicks forward-center na si Porzingis ang kumumpleto sa listahan matapos makopo ang ika-15 puwesto.
Pagdating sa team sales, ang Cleveland Cavaliers ang tinanghal na pinakasikat sa team merchandise sa unang pagkakataon magmula noong Enero 2015.
Maliban sa Cavaliers ang iba pang bumubuo sa top 10 team merchandise sales ay ang Warriors, Lakers, Chicago Bulls, Thunder, San Antonio Spurs, Miami Heat, Toronto Raptors, Knicks at Boston Celtics.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.