GMA may sariling bersyon ng ConCon

     Naghain ng resolusyon si dating Pangulo at ngayon at Pampanga Rep. Gloria Arroyo upang magpatawag ng Constitutional Convention para amyendahan ang 1987 Constitution.      “Whereas, almost three decades had already passed since the people ratified the current Constitution through a plebiscite on February 2, 1987,” saad ng Concurrent Resolution 1 na inihain ni Arroyo kasama si Surigao del Sur Rep. Prospero Pichay. “Whereas, it has become apparent that the time has come for the people to revisit the current Constitution to implement changes that would be responsive  to the current needs of the nation.”      Sa ilalim ng panukala ni Arroyo, ang ConCon ay bubuuhin ng 12 senador, 12 kongresista at 24 na delegado na itatalaga ng Pangulo mula sa iba’t ibang sektor ng lipunan.      Nakasaad doon na hindi maaalis sa puwesto ang mga senador at kongresista na uupo sa ConCon subalit wala umano silang matatanggap na sahod sa dagdag na trabaho na ito.      Ang mga delegado naman na itatalaga ng pangulo ay makatatanggap ng sahod katulad ng natatanggap ng mga kongresista.      Kung empleyado ng gobyerno, miyembro ng Armed Forces o opisyal ng Government Owned and Controlled Corp., ay maaalis naman sa trabaho kapag tinanggap ang pagiging delegado sa ConCon.      Itinakda ni Arroyo sa 120 araw ang trabaho ng ConCon at matapos ito ay kailangan nilang magsumite ng nirebisang bersyon ng Konstitusyon.      Susunod namang ipatatawag ng pangulo ang plebesito sa loob ng 60 araw matapos niyang matanggap ang report ng ConCon. Sa plebesito malalaman kung pabor ang publiko sa pagbabago o hindi.