Close-up tragedy iimbestigahan bukas

Magsasagawa ng pagdinig ngayong araw ang Kamara de Representantes kaugnay ng pagkamatay ng limang katao na pumunta sa Close-Up Forever Summer Concert sa SM Mall of Asia noong nakaraang buwan. Sinabi ni Quezon City Rep. Winston Castelo, chairman ng House committee on Metro Manila Development, na sesentro ang pagdinig kung papaano nakapasok ang mga ipinagbabawal na gamot gaya ng Green Amore sa concert ground sa kabila ng seguridad na ipinatutupad ng Activation Advertising Inc. “We have to look into the security measures implemented to determine possible security lapses,” ani Castelo. “No one will be exempted. The State will go after them. The full force of the law will be implemented to give justice to the victims for their negligence.” Bukod sa komite ni Castelo kasama sa pagdinig ngayong umaga ang House committee on Dangerous Drugs at on Youth and Sports. Sinabi ni Castelo na kanilang hahanapin kung saan nagkaroon ng kapabayaan kaya nakapasok ang mga ipinagbabawal na gamot sa loob. “Every organization involved in the tragic event will be given ample time to explain their specific roles, particularly the agency tasked to secure every point of entry of the event ground,” dagdag pa ni Castelo. Ang Activation Advertising Inc., ay isa sa mga kompanya na kinuha ng Uniliver— ang may-ari ang produktong Close-Up upang pangasiwaan ang concert. Ipinatawag din sa pagdinig ang National Bureau of Investigation, Philippine Drug Enforcement Agency, SM, Unilever Philippines Inc., Pasay Police at Event Organizer. Matapos ang concert noong Mayo 22 ay apat na katao ang natagpuang walang malay sa magkakahiwalay na lugar ng concert ground. Ang ikalimang nasawi ay binawian ng buhay sa ospital. May mga nagsasabi na uminom ang mga ito ng Green Amore, isang drug na pinaghalo-halong Ecstasy, Shabu at iba pa.