PINAYUHAN ni Vice Ganda ang mga kabataan na hangga’t maaari ay huwag nang tumikim ng droga dahil wala talaga itong maidudulot na maganda.
Nag-post ng kanyang saloobin ang TV host-comedian sa kanyang social media accounts tungkol sa nangyaring kontrobersiya sa ginanap na “Forever Summer Concert” sa SM Mall of Asia concert grounds noong Sabado, kung saan lima katao ang nasawi.
Sa huling ulat base na rin sa imbestigasyon ng Philippine National Police at National Bureau of Investigation, massive heart attack ang naging sanhi ng pagkamatay ng mga biktima. Nakainom daw ng party drugs ang mga ito habang ginaganap ang Close Up concert. Patuloy pa ring iniimbestigahan ng mga otoridad ang insidente.
Ayon kay Vice, kailangang maging matatag ang mga kabataan at matutong humindi sa mga kaibigan o kabarkada na mamimilit sa kanila na gumamit ng drugs. Sa kanyang Twitter account, nag-post ang host ng It’s Showtime para paalalahanan ang mga kabataan, lalo na ang mga estudyante tungkol sa masamang epekto ng illegal drugs.
Sey ni Vice, “REAL FRIENDS share REAL FUN moments NOT drugs.” “Di cool ang drugs! Kaya tantanan mo. Di yan ikagaganda kundi ikadadali ng buhay mo. At pag nangyari yun di ka cool, cold ka!”