Rating ni Duterte bababa sa rape joke

Naniniwala ang kampo ng pambato ng Daang Matuwid na si Mar Roxas na bababa ang rating ni Davao City Mayor Rodrigo Duterte matapos ang pahayag nito kaugnay ng ginahasang Australian missionary. Sinabi ni Akbayan Rep. Barry Gutierrez, spokesman ng Team Daang Matuwid, na ginawa ang survey na inilabas ng ABS-CBN 2 kahapon bago ang pahayag ni Duterte sa kaso ni Jacqueline Hamill. “Halos walang pagkakaiba ang resulta ng survey na ito sa nakaraang survey. Pero kailangan nating alalahanin, ang survey na ito ay ginawa bago ang pambabastos ni Mayor Duterte sa alaala ni Jacqueline Hamill, isang biktima rape sa Davao City,” ani Gutierrez. Ayon kay Gutierrez kailangang magkaisa ang mga ‘disenteng Pilipino’ para hindi manalo si Duterte na naglalagay din umano sa bansa sa alanganin. “Nakikita sa survey ang pangangailangan na magkaisa ng mga disenteng Pilipino para maiwasan ang pagkapanalo ni Mayor Duterte at pagbabalik ng diktadurya sa Pilipinas,” ani Gutierrez. “Buo ang aming loob, disenteng Pilipino ang magwawagi sa darating na eleksyon.” Sinabi ni Gutierrez na hindi pa nananalo si Duterte subalit inaaway na niya ang mga kaalyadong bansa ng Pilipinas na naglalagay sa alanganin sa mga overseas Filipino workers. “Is this the President we want? How will he protect our OFWs if these countries are mad at him? Why is Mayor Duterte insulting our allies but he lets China rape our sovereignty? We are not seeing the true colors of Mayor Duterte: No regard for the plight of Filipinos, so long as he comes out as the hero.”