JV Ejercito naghain ng not guilty plea

Naghain ng not guilty plea si Sen. Joseph Victor ‘JV’ Ejercito sa kinakaharap nitong kasong graft sa Sandiganbayan Fifth Division kaugnay ng pagbili ng mga baril gamit ang Calamity Fund ng San Juan City noong 2008. Not guilty plea rin ang inihain ng mga kapwa akusado ni Ejercito na sina dating San Juan City Bids and Awards Committee members, city administrator Ranulfo Dacalos, treasurer Rosalinda Marasigan, city Attorney Romualdo Delos Santos, city budget officer Lorenza Ching at city engineer Danilo Mercardo. Kumpiyansa si Ejercito na mapapawalang-sala siya sa kaso kaya nais niya na madaliin ng korte ang pagdinig nito. “Kapag hindi ka guilty wala kang takot eh, so gusto ko matapos na ito,” ani Ejercito. “I don’t want this delayed any further, tapusin na natin kasi we are very, very confident with the evidence that we have.” Itinakda naman ang pre-trial ng kaso sa Hunyo 9 para ipakita ng prosekusyon at depensa ang kanilang mga ebidensya. Ang kaso ay kaugnay ng pagbili ng San Juan ng P2.1 milyong halaga ng baril. Si Ejercito ang alkalde ng lungsod noon. Hindi umano dumaan sa bidding ang pagbili ng mga baril sa HK Tactical Defense System Inc. Kinuha rin umano ang pondo sa Calamity Fund. Naglagak na si Ejercito ng P30,000 piyansa para sa kanyang pansamantalang kalayaan matapos na magpalabas ng warrant of arrest ang korte. Bukod dito si Ejercito ay nahaharap din sa kasong Illegal Use of Fund kaugnay ng pagbili ng baril na nasa sala ng Sandiganbayan Sixth Division.