Meralco Bolts sinagasaan ng NLEX Road Warriors
Mga Laro Ngayon (Cuneta Astrodome) 3 p.m. Star vs Phoenix Petroleum 5:15 p.m. Alaska vs Globalport
PINUTOL ng NLEX Road Warriors ang kanilang losing skid matapos patumbahin ang Meralco Bolts, 104-99, sa kanilang 2016 Oppo PBA Commissioner’s Cup elimination round game kahapon sa Smart Araneta Coliseum sa Cubao, Quezon City.
Gumawa si Al Thornton ng 38 puntos at 12 rebounds para pangunahan ang Road Warriors (3-3) na winakasan ang dalawang sunod na pagkatalo.
Sina Garvo Lanete at Kevin Alas ay nag-ambag ng 14 at 10 puntos para sa NLEX.
Pinamunuan naman ni Arinze Onuaku ang Meralco (5-2) sa itinalang 16 puntos at 18 rebounds.
Sina Baser Amer at Jared Dillinger ay gumawa ng tig-14 puntos, si Jimmy Alapag ay may 11 puntos at sina John Ferriols at Chris Newsome ay may tig-10 puntos para sa Bolts, na nakatikim ng ikalawang sunod na pagkatalo.
Samantala, makuha ang ikalimang diretsong panalo at manatili sa top spot ang tatangkain ng Alaska Aces (4-1) sa pagsagupa sa Globalport Batang Pier (2-4) sa kanilang alas-5:15 ng hapon na salpukan ngayon sa Cuneta Astrodome sa Pasay City.
Mag-uunahan naman ang Star Hotshots (2-4) at Phoenix Petroleum Fuel Masters (2-3) sa pagkubra ng ikatlong panalo sa opening game dakong alas-3 ng hapon.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.