LINGAYEN, Pangasinan — Maagang nabalot ng upset at kontrobersiya ang 2016 Philippine National Games matapos mabigo ang ilang miyembro ng national chess team dito sa Narciso Ramos Sports and Civic Center.
Itinala ni FIDE Master Narquinden Reyes ng Mandaluyong ang matinding upset sa Men’s Random Chess matapos itong maka-iskor ng apat na puntos upang malamangan sina Grandmaster Rogelio Antonio Jr. at Richard Bitoon na mga miyembro ng PH team at kapwa may 3.5 puntos lamang.
Kampeon muli sa Women’s Random Chess si WGM candidate at WIM Janelle Mae Frayna laban kina WFM Cherry Ann Mejia ng Pangasinan at WFM Marie Antonette San Diego.
Kapwa may tig-aapat na puntos ang tatlo subalit mas nakuha ni Frayna ang gintong medalya sa mas mataas na tie-break points. Wagi naman sa Men’s ASEAN chess si International Master Joel Pimentel na kabilang sa training pool kontra kina Grandmasters Darwin Laylo at Rogelio Antonio Jr.
Kapwa nagtala ng 3.5 puntos ang tatlo subalit mas mataas ang puntos ni Pimentel sa tie-break para iuwi ang gintong medalya.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.