MARIAN RIVERA, DINGDONG DANTES AT BABY LETIZIA
NGAYONG Marso, ipinagdiriwang ng Tonight with Arnold Clavio ang ikaanim na taon nitong paghahatid ng kwentuhang hindi lang masaya at makabuluhan, kundi puno ng tugtugan at tawanan.
Espesyal ang anniversary episode ng TWAC ngayong March 2 at 9 dahil makakasama ni Arnold Clavio ang first time daddy at Kapuso Primetime King na si Dingdong Dantes.
Ilang taon na rin ang lumipas mula nang huling bumisita si Dingdong sa programa, kaya naman ngayon ay napakarami niyang baong kuwento na tiyak ay kagigiliwan ng kanyang fans.
Una na riyan ang eksklusibong munting “interview” ni Igan sa unica hija nina Dingdong at asawang si Marian Rivera—ang napaka-cute na si Baby Letizia. Kahit nga ilang buwan pa lamang itong si Baby Zia, aba’y tila nangungusap nang sorpresang mag-phone patch ang mag-ina sa programa. Sa pag-uusap nina Marian at Igan sa telepono, ibubuko ni Marian kung ano nga bang klaseng asawa at daddy si Dingdong.
Hindi rin lingid sa kaalaman ng lahat na nagsimula bilang dancer si Dingdong sa grupong Abztract.
Pero mahilig din pala ang Kapuso actor sa rakrakan at napakagaling pang tumugtog. Kaya naman hindi palalampasin ni Igan ang pagkakataong maka-jamming si Dingdong—hindi lamang sa sayawan kundi pati sa tugtugan.
At sa “Nasubukan Mo Na Ba?”, mabubuko ang ilang mga hindi pa nalalamang kuwento tungkol kay Dingdong na tiyak na magdudulot ng kasiyahan sa mga manonood.
Tutukan din ang ilan sa mga detalye tungkol sa mga plano nina Dingdong at Marian para sa kanilang panganay na si Baby Letizia na napakablis daw lumaki kahit dalawang buwan pa lamang.
Pero nauna nang sinabi ni Marian na wala pa silang balak payagan ang anak na lumabas sa anumang TV commercial this early. Masyado pa raw bata si Baby Letizia para ma-expose sa mga ilaw ng camera.
Sama na sa masayang interview kay Dingdong sa two-part anniversary episode ng Tonight with Arnold Clavio ngayong Marso 2 at 9, 10:15 p.m. sa GMA News TV.