“BITIN!” Iyan ang komento ng ilang nakausap namin tungkol sa finale episode ng seryeng On The Wings Of Love ng magkasintahang James Reid at Nadine Lustre.
Sinang-ayunan namin sila dahil kahit kami ay nabitin sa ending ng love story nina Clark at Leah, napakarami raw kasing commercial ng huling episode ng serye kaya parang nakulangan ang mga manonood.
Pero siyempre, hindi naman binigo ng Dreamscape Entertainment ang lahat ng OTWOListas dahil naganap nga ang inaasahan nilang pagpapakasal nina Leah at Clark.
Masuwerte naman ang mga OTWOListas na sumugod sa Ynares Center sa Antipolo City upang sabay-sabay na masaksihan ang pinakai-nabangang pag-iisang dibdib nina Clark at Leah sa live viewing party kasama ang buong cast.
Umaga pa lang ay mahaba na ang pila sa Ynares ng JaDine fans na mula pa sa iba’t ibang dako ng bansa at hindi nagpaawat na maipadama ang kanilang mainit na suporta kina James at Nadine .
At sa paghahalikan ng mag-asawang Medina sa entablado ng Ynares, hindi napigilan ng lahat na maghiyawan dulot ng nag-uumapaw na saya at kilig na kanilang nadama.
Nagkagulo din ang netizens sa kilig na dala ng OTWOL kaya naman umabot sa halos apat na milyon ang tweets ng official hashtag ng pa-labas na #OTWOLTheLastFlight.
At sa pagtatapos ng programa, lubos na nagpasalamat ang dalawa sa pagsubaybay ng lahat sa love story nina Leah at Clark at sa pagmamahal na kanilang natatanggap mula sa kanilang fans.