Makabuluhang paghihintay. Ganu’n kung ilarawan ni Richard Gutierrez ang pagdating sa kanya ng proyektong Ang Panday na isang klasikong obra ng henyong nobelistang si Direk Carlo J. Caparas.
Nagpahinga pansamantala ang guwapong aktor sa pagiging aktibo sa paggawa ng serye at pelikula, pero tama ang matangkad na aktor, parang inipon lang ng Ang Panday ang nawala sa kanya nang isang bagsakan lang.
Si Richard Gutierrez ang pinakaguwapong Panday, napakalaking karangalan para sa kanya ang gumanap sa papel ni Flavio, na dating ginampanan ng yumaong Hari Ng Pelikulang Pilipino na si Fernando Poe, Jr. na sinundan naman ng aktor-pulitikong si Senador Bong Revilla.
Sa teaser pa lang ng Ang Panday ng TV5 sa pakikipagpareha ng network sa Viva Entertainment ay mapanghalina na ang serye. Sa madiin pa lang na pagpukpok ni Richard sa umaapoy niyang sandata ay magkakaroon na agad ng interes ang manonood na subaybayan ang pinagbibidahan niyang serye.
Si Direk Mac Alejandre na gumawa ng Ang Panday ni Senador Bong Revilla ang humahawak ng serye, maraming kakaiba sa atake ng obra ni Direk Carlo J. Caparas ang malapit nang mapanood sa TV5, ilang mukha ni Panday ang tatambad sa mga televiewers.
Sa kontrabida pa lang ni Richard na si Christopher de Leon ay nang-iimbita na ang serye, marami nang nasasabik sa paglipad ng armas ni Flavio, katutuk-tutok ang Ang Panday.