Sa Sabado nang gabi, pagkatapos ng Born To Be A Star na muling maglalantad sa talento ng mga Pinoy, ay isusunod agad ang Tasya Fantasya ng TV5 at Viva Entertainment.
Dalawang magkasunod na bagong programa ang ihahandog ng TV5, isang bagong paghamon para kay Mark Neumann, ang habampanahon naming aalalahanin bilang Tak-Gu ng Baker King.
Nu’ng huli naming makita si Mark sa TV5-Reliance ay hindi na namin masyadong pinansin ang kanyang hitsura, sanay na kaming makita ang kanyang kaguwapuhan, ang mas lumaki niyang pangangatawan ang mas binigyan namin ng atensiyon.
“I always go to the gym, I want to be fit,” simpleng sabi ng guwapong tisoy. Ang pananatili ng magandang kalusugan niya ang dahilan ng pagpunta niya sa gym at hindi ang mas pagpapalaki pa ng kanyang katawan.
Si Mark ang leading man ni Shy Carlos sa Tasya Fantasya, isang palabas na siguradong susundan-tututukan ng mga bata, pero magugustuhan din ng mga may edad na naniniwala sa mga pangarap na nagkakaroon ng katuparan.
“Masaya kami sa set, para kaming naglalaro lang. Walang pagod, walang stress, I’m with the company of professional actors,” sabi pa ni Mark. Nahasa na nang husto ang pananagalog ng binata, maraming salamat sa Wattpad Presents kung saan siya nabibigyan ng iba-ibang roles, naging matibay na pundasyon ang nasabing programa sa kagustuhan niyang mawala ang kanyang British accent.