PIA WURTZBACH
WALANG ibibigay na tax exemption si Miss Universe 2015 Pia Alonzo Wurtzbach sa kabila ng pagbibigay nito ng karangalan sa Pilipinas.
Sa ulat ng Bandila, ipinagdiinan diumano ni Bureau of Internal Revenue Commissioner Kim Henares na kailangan pa ring ideklara ni Pia ang lahat ng napanalunan nito sa Miss Universe sa pagbabalik niya sa bansa.
Wala pang sinasabi si Pia kung magkano talaga ang napanalunan niya bilang 2015 Miss Universe. Sa ilang panayam kay Pia, sinabi nitong ang korona pa lang na ipinutong sa kanya ay nagkakahalaga na ng P40 million.
Nakatakdang bumalik si Pia sa Pilipinas bago matapos ang buwan. Isang bonggang homecoming ang nag-aabang sa kanya pagbaba pa lang niya sa airport. Nakatakda na rin ang courtesy call niya sa Malacañang. Sa pagkakaalam namin, paparada si Pia sa Maynila, Makati at Quezon City. Bibigyang-parangal din siya sa Kongreso.