740 PNP ground commanders binalasa
Pinalitan ng National Police ang 740 nitong ground commander, kabilang ang ilan na nakatalaga sa “vote-rich areas,” kasabay ng pag-arankada ng panahon ng eleksyon.
Binigyan ng “reassignment” orders ang 25 provincial director, siyam na city director, 27 commander ng provincial maneuver units, 147 chiefs of police, at 532 iba pang opisyal, sabi ni Chief Supt. Wilben Mayor, tagapagsalita ng PNP.
“The reassignment of commanders is in line with the limited rotation of personnel and part of the best practices implemented by the PNP during election period,” sabi ni Mayor sa isang kalatas.
Napag-alaman ng Bandera na kabilang sa mga na-reassign ay mga provincial director ng “vote-rich” na lalawigan ng Cebu at Laguna, habang ang iba pa’y mga pinuno ng provincial commands sa Albay, Ilocos Norte, at Aklan.
Si Senior Supt. Noel Gillamac ay pinalitan ni Senior Supt. Clifford Gainarod bilang direktor ng Cebu provincial police habang si Senior Supt. Ronnie Montejo ang humalili kay Senior Supt. Florendo Saligao sa Laguna police.
Pinalitan din ang mga officers-in-charge o acting director ng Cebu City at Mandaue City ng Cebu, na noong 2013 elections ay mayroong 2.5 milyon registered voters.
Papalitan nina Senior Supts. Benjamin Santos at Jonathan Cabal sina Senior Supts. Marciano Batiancela at Julian Entoma bilang mga hepe ng police units sa Cebu City at Mandaue, ayon sa pagkakasunod.
Sa Ilocos Norte, na kilala namang lalawigan ng Marcos political family, pinalitan din bilang provincial police director si Senior Supt. Albert Ocon. Hinalinhan siya ni Senior Supt. Jose Melencio Nartates kahapon.
Sa Albay, hinalinhan ni Senior Supt. Celso Cinco Arcueno si Senior Supt. Marlo Meneses habang si Senior Supt. John Mitchell Jamili ang pumalit kay Senior Supt. Iver Apellido sa Aklan.
Ayon kay Mayor, lahat ng mga na-reassign ay umabot o lumampas na sa 2-taong “tou of duty” sa kanilang mga puwesto.
Pero napag-alaman ng Bandera na sa Marso pa maaabot ni Meneses ang ikalawang taon ng panunungkulan sa Albay.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.