Meralco
Bababa ng 21 sentimos ang singil ng Manila Electric Company ngayong buwan.
Ang pagbaba ay bunsod ng bumabang generation charge o gastos sa paggawa ng kuryente. Bumaba ito ng 21 sentimos kada kilowatt hour.
Bumaba rin ang buwis ng P0.02 kada kilowatt hour.
Nagkakahalaga ito ng pagbaba na P42 sa mga kumokonsumo ng 200 kWh kada buwan, P84 sa 400 kWh at P105 sa 500 kWh.
Ayon kay Joe Zaldarriaga, spokesman ng Meralco, ang singil ngayong buwan ang pinakamababa mula noong Enero 2010.
Noong Disyembre ay nagpatupad ang Meralco ng P0.055/kWh na pagtaas dulot ng pagtaas ng generation at transmission charges.
Tumaas din ng P0.13/kWh ang singil ng Meralco noong Nobyembre matapos ang anim na buwan ng sunod-sunod na pagbaba.
Pitong planta ng kuryente naman ang magsasara ngayong buwan para sumailalim sa pagkumpuni kaya maaaring ito ang magpataas ng singil sa Pebrero.
