IDINIPENSA agad ni direk Wenn Deramas ang best friend niyang si Ai Ai delas Alas sa chismis na pinatulan lang ang komedyante ng bago niyang boyfriend dahil sa pera nito.
Marami kasing nag-iisip na datung lamang ng comedienne ang habol sa kanya ng negosyanteng si Jed Salang, bagay na kinontra ni direk Wenn.
Ang sabi ni direk, ubod ng yaman ang angkan ng dyowa ni Ai Ai. Meron itong pag-aaring car company na siya mismo ang nagma-manage.
Sabi pa ni direk Wenn, baka may ibang dahilan kung bakit nagustuhan ang komedyante. Maaari raw na nagandahan ang boyfriend nito o kaya nabaitan kay Ai Ai.
Well, bakit nga sa tuwing may bagong boyfriend si Ai Ai na mas bata sa kanya ang palaging issue ay pera?
Parang pinalalabas nila na walang ibang pwedeng habulin ang isang lalaki kay Ai Ai kundi ang datung nito.
Pero kung totoo man na pera lang ang habol ng guy kay Ai Ai, e, ang mahalaga masaya ang Comedy Queen sa kanyang personal na buhay ngayon.
E, ano kung may involved na pera, malay n’yo naman, eventually, ang kagandahan at ang kabutihan ng puso ng komedyana ang mas lalong magpatibay ng kanilang relasyon, di ba?
Ika nga, walang basagan ng trip, kanya-kanyang emote lang ‘yan sa buhay.
At feeling ko naman, may pagmamahal talagang involved sa kanilang relasyon na ilang buwan na ring tumatagal.