Isang lalaki ang nasawi habang isa pa ang malubhang nasugatan nang araruhin ng dump truck ang apat na mas maliit na sasakyan sa Daraga, Albay, kaninang umaga.
Nasawi si Jimmy Ortega, 57, driver ng tricycle, habang malubhang nasugatan si Angelo Belaro, 37, driver ng isa pang tricycle, sabi ni Senior Insp. Maria Luisa Calubaquib, tagapagsalita ng Bicol regional police.
Naganap ang insidente dakong alas-8:20 ng umaga, habang minamaneho ni Ricardo Nabesa Jr., 48, ang dump truck (TOW-316) sa Purok 2, Brgy. Busay.
Nasalpok ng dump truck ang tricycle (MC-3819) ni Belaro, jeepney (EVM-240) na dala ng isang Aziel Dairo, tricycle (5582-IW) ni Ortega, at Toyota Revo (WEC-824) ni Genly Lopez, ani Calubaquib.
Minamaneho ni Nabesa ang trak mula Guinabatan patungong Daraga proper, nang bigla umanong magloko ang preno nito kaya nasalpok ang apat na sasakyan.