SASAMPAHAN ng National Bureau of Investigation (NBI) ng kasong robbery-extortion ang mga miyembro ng Philippine National Police-Aviation Security Group (PNP-Avsegroup) kaugnay ng kanila umanong pagkakaugnay sa tanim-bala modus sa loob ng Ninoy Aquino International Airport (NAIA).
Ang Task Force Talaba (Tani, Laglag Bala) na binuo ni Justice Secretary Alfredo Benjamin Caguioa ang siyang nag-imbestiga at nagrekomenda ng pagsasampa ng kaso kaugnay sa extortion scheme.
Nauna nang binigyan ang NBI hanggang Nobyembre 18 para tapusin ang imbestigasyon, bagamat humiling ito ng karagdagang panahon.
Nagtalaga rin ang DOJ ng mga prosecutor habang nagkaloob naman ang Public Attorneys Office (PAO) ng mga abogado sa paliparan para mapabilis ang proseso at maiwasan makaabala sa mga nagbibiyahe.