LIMA katao ang sugatan nang sumambulat ang isang granada malapit sa public market ng Kabacan, Cotabato Sabado ng gabi.
Kinilala ang mga sugatan na sina Berlie Baluyot, 46; Rosalie Parenas, 36; John Clark Opena, 13; Gerardo Moya, 48; at Johainna Pops Alon, 17.
Ayon kay North Cotabato provincial police spokesman Supt. Bernard Tayong, naganap ang pagsabog alas 6:30 sa panulukan ng Rizal avenue at Malvar street na malapit sa pamilihang bayan.
Dalawang lalaki na lulan ng motorsiklo ang nakitang naghagis ng granada, ayon pa kay Tayong.
Ang pagsabog ay naganap ilang araw lang ang nakalipas matapos pasabugan ang isang police outpost sa barangay Kayaga sa bayan din ng Kabacan, nitong Miyerkules, na ikinasugat naman ng isang 4-anyos na batang lalaki.