Isinailalim sa pinakamataas na alerto ang lahat ng unit ng pulisya sa Palawan matapos ang pananambang na ikinasugat ng dalawang alagad ng batas at isang aide ni Palawan Board Member Abraham Ibba sa bayan ng Bataraza kahapon ng hapon.
Bukod sa pagdedeklara ng “full alert,” inatasan din ng provincial police ang lahat ng istasyon ng pulisya na magsagawa ng checkpoint, ayon sa ulat ng Mimaropa regional police.
Naganap ang pananambang dakong alas-2:10, habang dumadaan ang mga sasakyan nina Ibba, ng PPSC, at Bataraza Police sa Sitio Narra, Brgy. Tarusan.
Galing noon ang mga pulis at si Ibba, na residente ng Bataraza, sa Brgy. Culandanum kung saan sila nag-imbestiga at nag-clearing operation kaugnay ng pamamaril na naganap noong Martes.
Habang binabagtas ang barangay road sa Sitio Narra, Brgy. Tarusan, biglang pinaputukan ng mga armado ang mga sasakyan nina Ibba at mga pulis kaya gumanti ang mga alagad ng batas.
Tinamaan ng bala sa balikat sina SPO3 Erwin Baldemosa at SPO2 Ronald Castro, kapwa nakatalaga sa Palawan Provincial Public Safety Company, habang ang driver ni Ibba na si Bani Sadar ay tinamaan sa ulo at panga, ayon sa ulat.
Nagpadala na ng karagdagang tauhan ang PPSC at militar para tugisin ang mga salarin.