Niyanig ng lindol na may lakas na magnitude 5.4 ang Occidental Mindoro kamakalawa ng gabi at umabot ang pag-uga nito sa Metro Manila.
Nagbabala ang Philippine Institute of Volcanology and Seismology na maaaring magdulot ng aftershocks ang paggalaw na ito.
Naramdaman ang lindol alas-9:50 ng gabi at ang sentro nito ay natunton may 22 kilometro sa silangan ng Looc.
May lalim itong 100 kilometro at sanhi ng paggalaw ng tectonic plate sa lugar.
Intensity V ang naitalang paggalaw sa Looc, Abra de Ilog at Paluan sa lalawigan ng Occidental Mindoro; at Batangas City.
Intensity IV naman sa Muntinlupa City; Pasay City; Mandaluyong City; Makati City, Parañaque City; Tagaytay City; San Pedro at Canlubang sa Laguna; Calamba City; Puerto Galera sa Oriental Mindoro; Mamburao sa Occidental Mindoro; General Trias at Bacoor sa Cavite. Naitala naman ang Intensity III sa Quezon City; Mandaluyong City; Taguig City; Manila City; Talisay at Agoncillo sa Batangas; Calapan City; Malolos, Obando at Bulacan sa Bulacan; at Angeles City. Intensity II naman sa Pasig City; Antipolo City; Las Piñas City; San Jose, Occidental Mindoro; Plaridel at Marilao sa Bulacan; Pateros, at Lucban sa Quezon.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.