INIIBESTIGAHAN na ngayon ng mga pulis kung nakainom ba o inaantok ang Kapuso star na si Alyssa Alano nang maaksidente ito kahapon ng madaling araw sa Marikina City.
Sa paunang ulat, malubhang nasaktan ang TV host-actress matapos ang insidente.
Ayon sa report, mismong si Alyssa ang nagmamaneho ng kanyang sport utility vehicle (VFH-668) nang bumangga siya sa isang center island sa kahabaan ng Marcos Highway malapit sa SM Marikina dakong alas-4 ng madaling araw.
Pero bago ito, nabangga rin daw ng sasakyan ni Alyssa ang isang Hondan sedan, sugatan ang apat na pasahero nito.
Mabilis namang nakaresponde ang mga awtoridad at agad na inilabas ng kanyang sasakyan si Alyssa na nagtamo raw ng serious injuries.
Base sa ulat, natusok daw ng bakal si Alyssa sa bandang tagiliran.
Sa aming pagtatanong, dinala sa ospital ang TV host kung saan siya binigyan ng first aid treatment.
Medyo maayos na raw ang kundisyon niya ngayon pero kailangan daw maoperahan agad ang kanyang tagiliran.