Patay ang isang nag-AWOL na pulis at kanyang kasabwat nang makipagbarilan sa mga alagad ng batas na dadakip sana sa kanila sa isang buy-bust operation sa San Rafael, Bulacan ngayong araw.
Nakilala ang isa sa mga napatay bilang si PO1 Edison Liwag, dating nakatalaga sa Provincial Public Safety Company bago nag-AWOL o liban na walang paalam, sabi ni Senior Supt. Ferdinand Divina, direktor ng Bulacan provincial police.
Naganap ang insidente sa Brgy. Tucod dakong alas-12:15 ng tanghali.
Nagsasagawa noon ang mga elemento San Rafael Police ng buy-bust operation laban kay Liwag, na isa umanong notoryus na drug pusher sa barangay, sabi ni Divina sa isang text message.
Pero nauwi ang eksena sa barilan, kung saan napatay si Liwag at ang kanyang di pa kilalang kasabwat, ani Divina.
Nahuli naman sa akto ng pagbebenta ng droga ang umano’y live-in partner ni Liwag kaya dinampot ng mga operatiba.
Nasamsam sa pinangyarihan ang isang kalibre-.9mm pistola, kalibre-.38 baril, at mga sachet na may hinihinalang shabu. (John Roson)