Senatorial lineup in Roxas binubuo na

Habang nililigawan si Camarines Sur Rep. Leni Robredo na maging bise ni Mar Roxas, binubuo na rin ang senatorial lineup ng Liberal Party.
Ayon kay Caloocan Rep. Edgar Erice 16 ang nasa listahan ng senatorial lineup ng Liberal Party at nangunguna rito si Bureau of Internal Revenue Commissioner Kim Henares.
Kasama sa listahan sina Justice Sec. Leila de Lima, Quezon City Mayor Herbert Bautista, PhilHealth director Risa Hontiveros, Manila Vice Mayor Isko Moreno, dating Energy Sec. Jericho Petilla, Metro Manila Development Authority chairman Francis Tolentio, Las Pinas Rep. Mark Villar, at dating Pampanga Gov. Mark Lapid.
Naroon din sina Senate President Franklin Drilon, Sen. Ralph Recto, Sen. TG Guingona, dating Sen. Francis Pangilinan at dating Sen. Panfilo Lacson.
“May dalawa pa na hindi ko na matandaan,” ani Erice, vice chairman for political affairs ng Liberal Party.
Inaasahan na bubuo na rin ng sentorial lineup ang tambalang Sen. Grace Poe at Sen. Francis Escudero at si Vice President Jejomar Binay na hindi pa inaanunsyo kung sino ang magiging running mate.