SINABI ng isang matalik na kaibigan ni pambansang kamao at Sarangani Rep. Manny Pacquiao na maaaring bumaligtad si Pacman at suportahan ang kandidatura ni Interior Secretary Mar Roxas.
Ayon kay Yacap Rep. Carol Jayne Lopez na mismong sinabi ni Pacquiao na bukas siya sa paglipat sa Liberal Party.
Si Pacquiao ay isa sa mga posibleng tumakbong senador sa ilalim ng partido ni Vice President Jejomar Binay sa 2016.
“Open siya (Pacquiao) pero nirerespeto niya pa rin ang present niyang partido,” sabi ni Lopez.
Kilalang malapit si Lopez kay Pacquiao. Kapwa sila nagmula sa Sarangani.
Idinagdag ni Lopez na napag-usapan na nila ni Pacquiao ang pagsuporta sa kandidatura ni Roxas sa 2016.
“Kami ni Cong. Manny lagi kami nag-uusap niyan sa isyu ng Sarangani. Napag-uusapan ang pulitika. Gusto ko magkasama kami ni Cong. Manny para buo ang Sarangani for Mar,” idinagdag ni Lopez.
Iginiit naman ni Lopez na hindi niya direktang tinanong si Pacquiao na umalis na ng United Nationalists Alliance (UNA).
Ayon kay Lopez, plano ni Pacquiao na tumakbo sa lokal na eleksyon o kumandidato muling kongresista sa Sarangani.
“Hindi naman namin sinasabi na umalis na siya sa UNA. But he is welcome to join Sec. Mar,” ayon pa kay Lopez.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.