Jessy Mendiola na-in love kay Ariel Rivera

BIBIDA ang Kapamilya actress na si Jessy Mendiola sa bagong episode ng Maalaala Mo Kaya ng ABS-CBN ngayong Sabado (Hunyo 6).

Gagampanan ni Jessy ang karakter ni Cecile, isang 18-anyos na dalagang iibig sa isang alkalde ng isang bayan na si Roel (gagampanan ni Ariel Rivera).

Sa kabila ng malaking agwat ng kanilang edad, mabubulag si Cecile sa pag-ibig at sa marangyang buhay na naibibigay sa kanya ni Roel kaya’t ipaglalaban niya ito sa kanyang pamilya.

Ngunit magbabago ang lahat nang mabuntis si Cecile at nagdesisyon si Roel na itago siya mula sa mga tao para sa mga plano niya sa pulitika. Ano ang kinailangang lampasan ni Cecile nang tuluyan na siyang iwanan ng lalaki na ipinaglaban at minahal niya nang buong puso?

Paano siya natulungan ng kanyang pamilya para tanggapin ang kanyang mga pagkakamali at ibuhos ang lahat ng kanyang pagmamahal para sa kanyang anak?

Sa ilalim ng direksyon ni Jerry Lopez Sineneng, ang episode ng MMK ngayong Sabado ay pagbibidahan din nina Irma Adlawan, Belle Mariano, Eda Nolan, Karen Timbol at Mike Lloren.

Ito ay sa ilalim ng panulat ni Benson Logronio. Ang MMK ay pinamumunuan ng business unit head nito na si Malou Santos.
Huwag palampasin ang longest-running drama anthology sa Asya, MMK, ngayong Sabado, 7:15 p.m., pagkatapos ng Home Sweetie Home” sa ABS-CBN.