VP Binay ikinalungkot ang pagsuporta ni Poe na kasuhan siya ng plunder

SINABI kahapon ng Vice President Jejomar Binay na nalulungkot siya sa desisyon ni Sen. Grace Poe na pirmahan ang draft report ng nagrerekomenda na siya ay sampahan na ng plunder kaugnay ng mga umano’y korupsyon na kinasasangkutan.

“Nalulungkot si Vice President Binay dahil mukhang pinanigan pa ni Senador Grace Poe ang mga senador na nang-usig sa kanya at sa kanyang pamilya at nang-bully ng mga inosenteng tao,” sabi ng spokesman for political concerns ni Binay na si Rico Quicho.
Inirekomenda ng draft report ng Senate blue ribbon subcommittee na kasuhan ng plunder si Binay, ang kanyang anak na si Makati Mayor Jejomar Erwin “JunJun” Binay at 18 iba pa.

“Sana man lang ay nabasa ni Senador Poe ang affidavit na isinumite ng Vice President pero binalewala ng sub-committee. Dito ay nilinaw ang mga usapin at ipinaliwanag kung bakit walang basehan ang paratang nila,” dagdag ni Quicho.

Ito’y kaugnay ng imbestigasyon ng Senate Blue Ribbon subcommittee na pinamumunuan ni Sen. Aquilino “Koko” Pimentel III kaugnay ng umano’y overpricing ng Makati City Hall 2 parking building.

“Plunder is a serious charge which must be fully established based on facts and prevailing jurisprudence before requiring an impeachable official like the Vice President to explain his innocence,” dagdag ni Quicho.