Xian, Kim waging PEP List Celebrity Couple of the Year

ANG Kapamilya loveteam na sina Kim Chiu at Xian Lim ang nagwaging Celebrity Pair of the Year sa PEP List Year 2.
Matapos ang halos tatlong buwan, pormal nang inihayag ng Philippine Entertainment Portal ang mga nanalo sa PEPsters’ Choice – ang botohan dito ay isinagawa sa pamamagitan ng online voting.

Bukod sa pagiging Celebrity Couple of the Year, nakuha rin ni Kim ang nga titulong Celebrity of the Year, Female Movie Star of the Year and Female FAB Star of the Year habang nasungkit din ni Xian ang Male FAB Star of the Year award.

Ang Kapuso royal couple naman na sina Dingdong Dantes at Marian Rivera ang PEPsters’ top choice para sa Newsmaker of the Year. Ayon sa mga bumubuo ng PEP, ito ay dahil na rin sa kanilang engrandeng kasal noong Dec. 30, 2014 na talaga namang pinag-usapan hindi lang sa Pilipinas kundi pati na rin sa ibang bansa.

Ang Kapamilya Teen King naman na si Daniel Padilla ang itinanghal na Male Movie Star of the Year, habang ang kanyang rumored girlfriend naman niyang si Kathryn Bernardo ang top choice ng mga bumoto bilang Female Teen Star of the Year.

Ang The Voice Kids Philippines runner-up na si Darren Espanto ang nagwaging Male Teen Star of the Year habang ang The Voice Kids grand champion ang top choice para sa kategoryang Child Star of the Year.

Ang resulta ng isinagawang online voting ay ini-labas ng Punongbayan & Araullo, ang kinuhang independent auditor ng PEP List. Ang formal announcement ng winners ay isinagawa nitong nakaraang Huwebes sa Seasons Ballroom ng Luxent Hotel sa Timog, Quezon City.

Tatlo lang sa winners ang nakapunta nang personal sa ginanap na presscon – sina Xian, Marian at Lyza Gairanod. Ayon kay Ms. Jo-Ann Maglipon ng PEP, ang awarding ceremonies naman ay magaganap sa June 18, sa Grand Ballroom ng Solaire Resort & Casino.

Dito rin ia-announce kung sinu-sino ang nanalo sa Editors’ Choice category ng PEP List Year 2, kabilang na ang Male and Female TV Star of the Year, Primetime Series of the Year, Daytime Series of the Year, Talk/Variety of the Year, Teleserye Actor and Actress of the Year, Breakout Star of the Year at marami pang iba.