Zsa Zsa binigyan ni Conrad ng promise ring

Promise ring at hindi engagement ring ang ibinigay kay Zsa Zsa Padilla ng kanyang live in partner na si Conrad Onglao.
Ayon kay Zsa Zsa, hindi pa nagpo-propose sa kanya ang negosyanteng BF pero may mga ipinangako ito sa kanya na sana raw ay matupad.

“May promise siya sa akin and tignan natin kung may matupad,” sey ng Divine Diva sa interview ng The Buzz last Sunday.
Ayon kay Kris Aquino, ipinagtanong na niya kung anu-ano ang meaning ng iba’t ibang kulay sa promise ring na suot ni Zsa Zsa.

“The pink gold symbolizes love, the yellow gold symbolizes fidelity, and the white gold symbolizes friendship. So it’s like love and friendship that will last forever,” esplika ng TV host-actress.

Kamakailan lang ay nag-celebrate sina Zsa Zsa at Conrad ng kanilang 10th monthsary at malamang dito ibinigay ng businessman ang promise ring kay Zsa Zsa.

Inamin din ng dalawa na na magkasama na sila ngayon sa isang bahay. Natatawa ring ikinuwento ng Divine Diva na talagang tinanong pa niya sa anak nasi Karylle kung bakit ba nagse-celebrate ng “monthsaries” ang mga magdyowa.

Ani Zsa Zsa, “Gusto kong makigaya ng monthsary. Sabi ko kay K (Karylle), bakit ba nagma-monthsary?’ Sabi niya, ‘Kasi mama, ang mga relationships ngayon mahirap na mag-last kaya kada-month na talaga (sine-celebrate).’”

Sinabi rin ng dating partner ng yumaong Comedy King na si Dolphy na iba ang kaligayahang nadarama niya ngayon sa piling ni Conrad at talaga raw ipinagdasal niya ang pagdating nito sa kanyang buhay matapos nga siyang “iwanan” ni Pidol noong July, 2012.

“I did (nagdasal sa pagdating ni Conrad sa kanyang buhay). I even asked the universe na this is what I want. Sabi ko kailangan talaga kumpleto,” aniya pa.

Sa huling interview naman namin sa mommy ni Karylle, sinabi nitong hindi na siya masyadong nag-e-expect ng kasal dahil parang may trauma na rin siya rito matapos ngang mapurnada ang wedding nila noon ni Mang Dolphy.