Tambalan nina Jolina at Marvin parang magic wand ni Harry Potter

JOLINA MAGDANGAL AT MARVIN AGUSTIN

Kahit inaantok-antok pa’t napapapikit habang kausap namin ay sige pa rin sa tsikahan namin ang box-office director na si Wenn Deramas noong magkita kami sa ABS-CBN kamakailan. May production meeting kasi that morning para sa week four ng bago niyang teleserye sa ABS-CBN, ang Flordeliza na malapit na malapit nang magsimula.

Last time nasabi sa amin ni Direk Wenn na ang Flordeliza ang papalit sa timeslot ng Pure Love. Pero nag-iba-iba ang schedule ng mga bagong shows sa Kapamilya network, so, ang isinalang after Pure Love ay ang Bagito nina Nash Aguas, Ariel Rivera, Angel Aquino, Agot Isidro, Alexa Ilacad at marami pang iba.

“Hindi ko pa rin alam (timeslot). Kasi, originally, I’ll be very, very honest, noong pinag-present ako ng ABS, ang ine-expect nila panghapong programa, okey. So, nagbigay ako sa kanila. In-approve nila. Pero nag-iba ang lahat noong napanood na nila,” paliwanag ni Direk Wenn.

Hindi rin niya masabi kung ilalagay sa primetime ang Flordeliza.  Basta sa ngayon, shoot lang sila nang shoot para maganda ang kalabasan. Very proud si Direk Wenn sa istorya ng Flordeliza at sa mga artista niya lalo na sa dalawang bagets na sina Ashley at Red.

“Hindi naman kasi sila ‘yung baguhan, ‘di ba? May acting experiences na sila. Si Ashley bilang batang Anne Curtis sa Dyesebel. Tapos may commercials. Si Red naman sa akin nagsimula. Mahuhusay sila,” sabi pa niya.

Bukod kina Ashley at Red, kasama rin sa cast ng Flordeliza ang nagbabalik Kapamilya na tambalan nina Jolina Magdangal at Marvin Agustin, plus ang napakahusay na si Carlo Aquino at Desiree de Valle. Naniniwala si Direk Wenn na may magic pa rin ang tandem nina Jolina at Marvin on screen.

“Hindi mawawala ang magic, tandaan ninyo ‘yan. Ang magic nae-enhance…ang magic nananahimik. Parang magic wand ni Harry Potter. Itinatabi lang sandali at kapag ginamit, at alam mo na kung paano  ‘to gamitin, mas marami kang magagawang wonders sa magic na ‘yan. At ganoon ang Jolina-Marvin, dahil ‘yung talent naman nila ay hindi kumukupas,” sey ni direk.

Dagdag pa niya, “Iku-quote ko si Ma’m Charo Santos, ‘Mahuhusay sila. Let’s go back to  the reliables.’ ‘Yan ang  linya niya. So, ah, ‘Wenn is so inspired,’ sabi niya (Charo), ‘Beautiful, congratulations.’ ‘Yan ang mga lines na namutawi sa ating mahal na Presidente ng ABS-CBN.”