Pagwawakas ng Ikaw Lamang inaabangan na ng madlang pipol

Huling dalawang  linggo na lang ang master seryeng Ikaw Lamang na pinagbibidahan nina Kim Chiu, Coco Martin at KC Concepcion sa Primetime Bida ng ABS-CBN.

Napapanood na ng madlang pipol ang teaser trailer ng magiging finale week ng Ikaw Lamang na may tagline na “Full Circle” na ang ibig sabihin nga, malapit nang magwakas ang number one primetime series sa telebisyon ngayon.

Sa direksiyon pa rin nina Malu Sevilla at Avel Sunpongco, asahan na ang mas pinatindi pang mga eksena sa serye, ano nga ba ang kahahantungan ng paghihiganti ni Gabriel (Coco) laban kina Franco (Boyet de Leon)? Magkaroon kaya ng happy ending ang pag-iibigan nina Gabriel at Andrea (Kim)? At ano naman ang magiging pasabog ni Natalia (KC)   ngayong alam na niya kung sino talaga ang minamahal ni Samuel? Handa nga ba siyang gawin ang lahat para mapasakanya ang lalaking iniibig?

Tutukan din kung ano ang magiging ending ng mga karakter nina Amy Austria bilang si Isabelle, Joel Torre bilang si Samuel, pati na rin ang kasumpa-sumpang si  Mylene Dizon bilang doble karang chief of staff ni Franco.

Kaya patuloy na subaybayan ang Ikaw Lamang para hindi mahuli sa kuwentuhan, mula Lunes hanggang Biyernes pagkatapos ng Hawak Kamay sa ABS-CBN Primetime Bida.