Vice may promise sa Star Cinema kaya pumayag kunin sina Dingdong at Richard sa ‘Fantastica’
DAHIL sinabi ni Vice Ganda na aabot sa P900 million ang kikitain ng Metro Manila Film Festival 2018 entry niyang “Fantastica”, pumayag ang Star Cinema executives na kunin sina Richard Gutierrez at Dingdong Dantes bilang mga leading man niya sa pelikula.
Kuwento ni Vice, “Tinanong kasi nila kung sino mga gusto kong makasama this time, e, siyempre kinapalan ko na ang mukha ko sa rami na rin naman ng mga nakasama ko siyempre nagkakaubusan na rin.
“Sabi sa akin masyadong malaki at mahal, sabi ko, ‘sige na kunin n’yo na tutal makaka-900 million naman tayo. Kaya sabi nila, okay, sige. Kaya i-claim natin na maka-P900 million nga,” pahayag ni Vice.
Nakatsikahan namin si Vice kasama ang internal media ng ABS-CBN pagkatapos ng storycon ng “Fantastica” sa Star Cinema office nitong Biyernes at sinabi nga nito na personal niyang kilala sina Richard at Dingdong kaya napadali ang pagkuha sa kanila.
“Si Richard kasi magkaibigan kami, magkumpare kami kaya nakakausap ko siya. Si Dong naman nagkakabiruan na ‘gawa naman tayong movie.’ Tapos nakausap ko si Perry (Lansigan-manager ng aktor) nilambing-lambing ko siya. Pumayag naman sila,” pahayag ng Unkabogable Star.
Magkakaroon ba ng kissing scene si Vice kina Richard at Dingdong? “Oo, para may abangan din tayong sapak kay tita Annabelle (Rama) at kay Marian (Rivera),” natatawang sagot ng komedyante sabay sabing, “Kasi pambata ‘yung pelikula kaya hindi naman puwede.”
Sabi namin baka puwedeng smack lang, “Ipu-push ko ‘yung smack. Ha-hahaha! Okay na ako sa yakapan.”
Masaya si Vice dahil pasok sa MMFF 2018 ang mga pelikula ng mga kaibigan niyang sina Coco Martin kasama si Vic Sotto (Popoy En Jack: The Pulisincredibles) at Anne Curtis (Aurora). “Ang saya nga kasi magkakaibigan kaming pumasok. Ang saya ng float, magkakawayan kaming lahat.”
Ang magdidirek ng “Fantastica” ay si Barry Gonzalez na naging assistant director noon ni Wenn Deramas, “Pero si direk Joyce (Bernal) pa rin ang creative consultant namin at siya pa rin ang mag-e-edit,” ani Vice.
Sa Hulyo 17 na ang first shooting day ng “Fantastica” kasama sina Maymay Entrata at Edward Barbers, Kisses Delavin at Donny Pangilinan, Chokoleit, Bela Padilla, Jaclyn Jose at marami pang iba mula sa Star Cinema at Viva Films.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.