Willie nakuha ang kiliti ni Digong; tatakbong senador o QC mayor?

HINDI lang sa mga senior citizen o mga lolo’t lola malakas ang karisma ni Willie Revillame, kundi pati na rin kay Pangulong Rodrigo Duterte at sa iba pang mga kilalang politiko.

Tila nakuha rin ng TV host-comedian ang kiliti ni PDu30 dahil balitang patuloy pa rin siyang nililigawan ng Pangulong Duterte para tumakbong senador sa darating na eleksyon.

Kamakailan ay nagkita ang dalawa sa burol ng yumaong ama ni Aga Muhlach na si Cheng Muhlach at dito nga raw nagkaroon ng chance magkausap nang masinsinan ang dalawa. Ayon sa ulat, nangako raw si Digong na susuportahan niya ang political plans ni Willie.

May mga nagsasabi na pwedeng-pwedeng tumakbong senador ang TV host pero may balita ring baka raw tumakbo siyang Mayor ng Quezon City.

Mas tumindi pa ang usaping ito nang makitang magkasama sina Willie at ang vice mayoral bet na si Congressman Winnie Castelo na naghahanap ng lugar sa QC para patayuan ng pabahay para sa mga mahihirap nating kababayan.

Wala pang official statement si Willie tungkol sa pagpasok niya sa politika sa 2019 pero ngayon pa lang ay nagpapahayag na ng suporta ang kanyang mga loyal fans, kabilang na ang mga senior citizens.