Marco Gallo: Hindi ko po nililigawan si Juliana, single po ako ngayon!

ISA ang ex-Pinoy Big Brother Lucky Season 7 housemate na si Marco Gallo sa mga gaganap na anak ni Karla Estrada sa pelikulang “Familia BlandINA” mula sa Arctic Sky Productions at idi-distribute ng Star Cinema.

Kamakailan ay naging laman ng balita si Marco dahil siya ang naging Prom Date ni Juliana Gomez, anak nina Ormoc Mayor Richard Gomez at 4th District Leyte Cong. Lucy Torres-Gomez, kaya tinanong namin kung paano sila nagkakilala ng unica hija ng mag-asawa.

“Pareho po kaming Bench endorser, we just met there and we became close friends and everyday we’re talking as friends. Wala po kasi siyang kasama sa prom and she ask me if I can go with her, sabi ko ‘okay wala naman akong gagawin,'” kuwento ni Marco nang makausap namin sa shooting ng “Familia BlandINA” last weekend.

Bago naman naging prom date ni Juliana si Marco ay nakilala muna ng aktor sina Goma at Lucy, “At first siyempre hindi ko sila kilala, siyempre it’s still scary na I meet the parents and they are big names in the industry. But in the end, he’s (Goma) been super nice to me.

“I like to know people before judging them and sobrang naging mabait sila sa akin, both parents,” ani Marco.

Sa Bench event din daw unang nakilala ni Marco sina Richard at Lucy at nakarating na rin siya ng Ormoc City. Kinlaro agad ng binatilyo na hindi siya nanliligaw kay Juliana pero aminado silang madalas silang lumabas kasama ang mga kaibigan nila.

“If I don’t have work po nagkakasama kami,” pag-amin ni Marco. “Hindi ko po siya nililigawan,” diin pa ng aktor.

Hindi rin daw niya nireregaluhan Juliana kapag nagkikita sila patunay na hindi siya nanliligaw sa dalaga, “No, why should I? And we’re not in the 1800 (years). If you’re courting, you have to give something, but I’m not courting.”

Pansin naming hindi showbiz si Marco kaya siguro nagustuhan din niya si Juliana, “She’s nice, one of the nicest I met in showbiz. Siyempre, ‘yung iba makikilala mo na buong pamilya nila artista. I met people na they’re not stick to the ground, they look at you by the cover at iyon ang kakaiba sa kanya. Dati hindi ko alam na anak siya ni Richard Gomez, then she’s like that and I’m proud,” pahayag nito.

Single si Marco ngayon at wala pa sa plano niya ang magkaroon ng karelasyon. Wala rin siyang permanent na ka-loveteam. Aniya, sa “Familia BlandINA” ay may partner siya pero surprise raw kung sino ito.

Bukod kina Karla at Marco, kasama rin sa pelikula sina Jobert Austria, Xia Vigor, Marissa Delgado, Buboy Garovillo, Twinkle Dy, sa direksyon ni Jerry Lopez Sineneng.