Juancho naka-survive sa galit ng AlDub fans; umaming ‘special’ si Maine
MAINE MENDOZA, ALDEN RICHARDS AT JUANCHO TRIVINO
BALIK-TELESERYE na ang Kapuso hunk na si Juancho Trivino matapos mapabalita ang pagbibigay sa kanya ng suspension order dahil sa pag-dirty finger niya noon sa isang standee ni Alden Richards.
Maayos na ang lahat, ayon sa binata nang makausap ng ilang miyembro ng entertainment media sa presscon ng bagong Kapuso series na Inday Will Always Love You. Nagkausap na sila ni Alden at naka-move na raw silang lahat sa nasabing kontrobersya.
“Oo, nagkausap na kami. Actually the day after the isyu nagkita kami sa GMA and everything is settled naman,” sey ni Juancho na isa sa mga leading man ni Barbie Forteza sa Inday Will Always Love You na mapapanood na sa GMA Telebabad simula May 21.
Nabibigyan daw ng malisya ang friendship nila ni Maine Mendoza dahil wala si Alden kapag lumalabas o gumigimik sila ng Dubsmash Queen.
“Yung kay Alden naman kasi, naging close kami nina Maine…sa ibang unit kasi kami. Si Alden kasi was usually sa main unit. Kami nina Sheena at Maine nasa dulo kami parati. So kami palagi ang magkakasama. But every time na we have scenes together like I posted on Instagram before na naglalaro kami ng mga board games, Alden is also part of our group,” paliwanag ni Juancho.
Totoo ba na kapag lumalabas sila nina Maine hindi nila niyayaya si Alden? “Invited. Invited si Alden. Hindi pa lang siguro nagkakaroon ng time kasi bihira yung nagkaka-hang out kami nina Maine at ni Alden.”
Natanong din ang aktor kung close ba talaga sila ni Maine at nasaan ito sa puso niya? Friends talaga kami. Special? Lahat naman ng friends ko special.”
Hindi ba naaapektuhan ng pamba-bash ng AlDub fans ang friendship nila ng ka-loveteam ni Alden? “Hindi naman po. In fact I would ask her sometimes din, nagko-consult ako sa kanya kasi siyempre isyu na naman yun.
“And parang sasabihin niya na hindi, okay lang yun, wala lang yun huwag mo nang intindihin. Tsaka siyempre lahat naman ng pananaw nirerespeto ko. Yung pananaw ng fans naiintindihan ko yun,” aniya pa.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.