June Mar Fajardo napiling PBA Player of Week

MULING ipinamalas ni four-time PBA Most Valuable Player June Mar Fajardo ang kanyang laki at husay matapos ihatid ang San Miguel Beermen sa 4-1 semifinal series win kontra Barangay Ginebra para umusad sa ikaapat na diretsong Philippine Cup Finals appearance noong Sabado ng gabi.

Ang 6-foot-10 sentro na si Fajardo ay nag-average ng 20.67 puntos at 12.67 rebound para mapili bilang PBA Press Corps Player of Week para sa period na Marso 13-18, kung saan pinangunahan niya ang Beermen sa mga panalo sa Game 4 at 5 na bumuhay sa hangarin nilang makuha ang All-Filipino conference “four-peat”.

Tinalo ng Barangay Ginebra sa iskor na 95-87 sa Game 3 noong nakaraang Martes, ang Cebuano big man ay nagtala ng double-double na 14 puntos at 13 rebound para pangunahan ang San Miguel Beer sa matinding ratsada sa Game 4 na naging daan para itala ng Beermen ang 102-81 pagwawagi kontra Gin Kings.

Tuluyan namang tinapos ng San Miguel Beer ang asam ng Barangay Ginebra na makapasok sa Finals matapos na ang 28-anyos na si Fajardo ay gumawa ng 25 puntos mula sa 11-of-18 field goal shooting na sinamahan pa niya ng siyam na rebound, tatlong assist at isang block sa 100-94 panalo ng Beermen sa Game 5.

Bagamat maganda rin ang mga ipinakitang laro nina Marcio Lassiter, Arwind Santos at Alex Cabagnot sa back-to-back na pagwawagi ng San Miguel Beer, nakopo pa rin ni Fajardo ang lingguhang parangal.

Hawak ang league-best na 24 PBA title, hangad ng San Miguel Beer na mapalawig ang kanilang dominasyon sa Philippine Cup kung saan nagawang maghari nito sa season-opening conference mula 2015 hanggang 2017.