Pakiusap ni Angel sa mga kababaihan: I vote we stop the girl-on-girl crime!

ANGEL LOCSIN

NAIS nang tuldukan ni Angel Locsin ang kontrobersiyang episode ng Pilipinas Got Talent kung saan nag-audition ang isang sexy all-female group na hindi nila binigyan ng “yes” vote ni Vice Ganda.

Bukod dito, nilinaw din ng aktres na walang isyu sa pagitan niya at ng iba pang judge ng PGT, kabilang na sina Robin Padilla at G. Freddie Garcia.

Sa panayam ng ABS-CBN, sinabi ni Angel na solid pa rin ang samahan nilang mga hurado at trabaho lang ang kanilang ginagawa kaya walang personalan.

“Yung comments ng kapwa judges, mahal na mahal ko kapwa judges ko, mahalaga kami sa isa’t isa.

Hindi kami nagbabastusan, ganun lang kami talaga. Siniseryoso lang namin itong ginagawa talaga,” ani Angel.

Ang advice ng dalaga sa mga mag-o-audition, “Siguro mas kailangan maghanda ng mga contestants kasi seryoso na ito talaga. Magagaling din ang ibang contestants kaya dapat magpakita sila ng kakaiba at pinakabest na performance na maibibigay nila talaga.”

At tungkol naman sa sexy girl group na nag-audition sa programa na binigyan niya ng red X button, nais niyang matapos na ang isyu. Hindi na rin niya pinatulan ang pasaring sa kanya ng isang miyembro ng grupo.

Tweet ni Angel, “Ladies, stop using derogatory remarks against each other. As women, we need to stick together to empower us collectively. I vote we stop the girl-on-girl crime!”