Best actor award ni Derek sa MMFF 2017 inireklamo

TINANGHAL na best actor ng MMFF si Derek Ramsay. Maligaya siyempre ang hunk actor, kaya lang ay maraming hindi masaya para sa kanyang tagumpay, mas maraming pabor na nanalo sana sina Edgar Allan Guzman at Joross Gamboa.

Umarte naman si Derek sa paraang alam nito, pero para sa higit na nakararami ay sina EA at Joross ang dapat pinarangalan bilang best actor, dahil ang ipinakitang pagganap ng dalawang aktor ay hindi mapapantayan ng ipinakitang pag-arte ni Derek Ramsay.

Ganu’n talaga, kani-kanyang bet ‘yan, hindi ngayon at si Derek ang tumanggap ng tropeo ay tapos na ang kuwento, siyempre’y may mga aangat para maglabas ng kanilang mga opinyon at saloobin, hindi nakuha ni Derek ang isandaang porsiyentong pagsang-ayon ng publiko.

Sabi nga ni prop, “Nakakahon lang ang acting na alam ni Derek, bigyan mo siya ng ibang role at siguradong bokya na siya! Hanggang du’n lang naman siya, umiikot lang sa lalaking iniwan ng karelasyon, ganu’n-ganu’n lang!

“Sige, gawin nga niya ang ipinakitang acting nina EA at Joross kung kakayanin niya? Pero ang role na ipinanalo niyang best actor, e, kayang-kayang itawid ng dalawang tinalo kuno niya!” maasim ang Bagong Taon ng kaibigan naming propesor.