Marvin nagdenay, wala raw itinatagong gay lover

TIME out muna si Marvin Agustin sa pagiging negosyante. Showbiz uli ang focus niya ngayon. Kasama siya sa latest GMA tearjerker series na Kambal, Karibal bilang bad guy na obsessed kay Carmina Villaroel.

Ang magdirek ang gusto sanang gawin ni Marvin sa GMA habang ka-text ang GMA boss na si Annette Gozon. Nag-aral kasi siya ng filmmaking sa New York University last year.

“Gusto kong mag-practice at nag-online workshop ako sa scriptwriting. Gusto kong mag-entertainment uli but supposedly off cam. Nag-usap kami nina Anette, Tita Redgie (Magno), Tita Lilybeth (Rasonable) tapos sabi, ‘May soap kami.’ ‘Anong gagawin ko?’ ‘Aarte ka muna!’ Ha! Ha! Ha! Sabi ko naman, okay fine.

“Alam ninyo naman, ang acting, hindi ko matatanggihan lalo na pag maganda ang role. Ang gusto nila pag magdidirek ako, ‘yung mga anthology muna and at the same time, with Don Michael Perez on the set, gina-guide niya ako sa pagpindot ng button.

“Sa NYU kasi one cam set up parang pelikula. TV muna ako. Habang nagti-training, at least may bayad! Ha! Ha! Ha!” pahayag ni Marvin sa presscon ng bagong Kapuso serye na Kambal, Karibal.

Kahit masasabing mayaman na, hinahanap pa rin ng katawan niya ang pag-arte.

“Ang pangarap ko, ako ang maging Eddie Garcia na kahit matanda na, may edad lang pala, talaga namang first on the set, last to leave on the set. Mahal na mahal ‘yung craft. Dito sa industriya natuto ako sa maraming bagay. Naging masaya, nabago ang buhay ko, ng pamilya ko. This is something I think I will ever, ever forget and leave!” katwiran ni Marvin.

Alam din ni Marvin na buntis muli ang dating ka-loveteam na si Jolina Magdangal. Kumusta naman ang lovelife niya?

“Ang lovelife, nandiyan lang. Live and love. Still very, very happy! I love life! Meron naman kaya lang iniisip ko pa kung ito ang tamang panahon. Bata pa ako! Ha! Ha! Ha!” iwas ni Marvin.

Mariin namang pinabulaanan ni Marvin ang naglabasang chika noon na may “something” sa pagitan nila ng hunk actor-singer na si Markki Stroem. Magkaibigan daw silang dalawa at hindi rin siya affected sa mga tsismis.

Hindi rin daw totoong may gay benefactor siya kaya sandamakmak na ang kanyang business ngayon. Sa tagal na raw niya sa showbiz, sanay na sanay na siya sa mga malilisyosong balita about him.