‘Maraming dahilan para pagselosan ni Marian si Andrea Torres!’

ANDREA TORRES

NAGPA-RELEASE na si Andrea Torres sa Triple A Productions ng mag-amang Tito Tony at Direk Mike Tuviera. Ang Artists Center na ng GMA 7 ang humahawak ngayon sa career ng maganda at seksing-seksing si Andrea Torres.

Dating magkasama sa isang management agency sina Andrea Torres at Marian Rivera, ang Triple A ang nagmamaneho sa kanilang career. Pero nagdesisyon si Andrea na umalis na sa produksiyon at lumipat sa Artists Center.

Kuwento ng isang source na nakausap namin, “Tama lang naman ang naging decision ni Andrea, tama lang na umalis na siya sa management agency na pinagrereynahan ni Marian.

“Kinaya ba siyang ipagtanggol man lang ni Rams David nu’ng talak-talakan siya at komprontahin ni Marian nang dahil lang sa pagseselos sa kanya? May nagawa ba ang dapat sana’y namamagitan sa mga hindi pagkakaintindihan ng mga alaga nilang artista?

“Walang kalaban-laban si Andrea du’n, kaya tama na ring nagpaalam siya kina Mr. Tuviera. Magmumukha lang siyang ewan du’n hanggang mas pinapaboran si Marian ng tinatawag niyang ateng na si Rams David,” kuwento ng aming source.

Nakita namin ang mga pictorials ni Andrea Torres sa social media. Napakaseksi naman pala talaga ng dalaga, bukod sa maganda pa at marunong umarte, may mga dahilan naman pala para atakihin ng selos at insecurity si Marian Rivera sa kanya.