TNT, SMB unahan sa ika-3 panalo sa Finals

Laro Ngayon (Smart Araneta Coliseum)
7 p.m. San Miguel Beer vs TNT KaTropa
(Game 5, best-of-7 Finals)

SASANDIG sa momentum ang TNT KaTropa sa paghahangad makamit ang ikalawang sunod at krusyal na ikatlong panalo kontra San Miguel Beer sa Game Five ng 2017 PBA Commissioner’s Cup best-of-seven championship ngayong gabi sa Smart Araneta Coliseum sa Cubao, Quezon City.

Ganap na alas-7 ng gabi muling maghaharap ang Tropang Texters na huling inuwi ang 102-97 panalo kontra Beermen para pagpantayin sa tig-dalawang panalo ang kampeonato.

Nakabalikwas sa Game Four ang TNT KaTropa mula sa magkasunod na kabiguan sa Game Two, 88-102, at Game Three, 97-109, matapos masungkit ang unang panalo sa serye, 104-102, noong Hunyo 21.

Tinabunan ng tagumpay ng Tropang Texters ang masaya sanang selebrasyon Miyerkules ng Beermen matapos na ibigay bago magsimula ang laro ang mga karangalan kina Chris Ross at Charles Rhodes bilang Best Player of the Conference at Best Import of the Conference.

“Let them get the individual awards. Let’s get the team award,” sabi ni Tropang Texters coach Raoul Cesar ‘Nash’ Racela. “That’s more important.”

Nagbalik sigla at ginanahan ang nakatakdang maging ama na si Joshua Smith mismong araw ng Miyerkules sa panganganak ng asawa nitong si Kristy matapos magtala ng 20 puntos at 15 rebounds upang ihatid ng Tropang Texters ang serye sa best-of-three na labanan.

Tumulong din sina Jayson Castro, Ranidel de Ocampo pati na ang mga young guns na sina Jeth Troy Rosario at Roger Pogoy para makabalik sa Game Four ang TNT KaTropa.

Hindi naman nababahala si San Miguel Beer coach Leovino ‘Leo’ Austria na makakaahon ang Beermen basta makatagal lang buong laro ang dalawa niyang frontcourtmen na sina June Mar Fajardo at Charles Rhodes.

“Our adjustments are minor lang. We’re not able to execute our game plan fully. That’s the thing na we would like to tell our players. I think we will be okay in the next game,” sabi ni Austria. “More or less you know what happened in the game. The big impact is with our big men, they got into foul trouble early. June Mar got two fouls already. We have a big problem cause if they’re in foul trouble, Smith can really dominate the shaded area.”