Mga Laro Ngayon
(Smart Araneta Coliseum)
4:15 p.m. TNT KaTropa vs Meralco
7 p.m. Star vs Rain or Shine
MAKUHA ang maagang 1-0 lead ang hangad ng third to sixth ranked teams na Star Hotshots, TNT KaTropa Texters, Meralco Bolts at defending champion Rain or Shine Elasto Painters sa pagsiklab ngayon ng kanilang 2017 PBA Commissioner’s Cup best-of-three quarterfinals series sa Smart Araneta Coliseum sa Cubao, Quezon City.
Aktuwal na tumapos ang Star na may 9-2 win-loss record sa 11-game elimination round kasalo ang No. 1 at 2 seeds na Barangay Ginebra Gin Kings at San Miguel Beermen. Pero lumagpak ang Hotshots sa third spot dahil sa mas mababang quotient para ikasa ang pakikipagtuos sa sixth placer at may 5-6 record na Elasto Painters sa alas-7 ng gabi.
May 8-3 kartada ang No. 4 seed TNT KaTropa samantalang No. 5 seed ang sister team nitong Meralco (7-4) na magsasabong sa sariling quarterfinals matchup sa alas-4:15 ng hapon.
May taktika nang nakalatag si Meralco coach Norman Black para makatatlong sunod sa TNT KaTropa na sinilat nito sa Philippine Cup elims noong Disyembre 9, 98-87, at sa Commissioner’s Cup elims nitong Marso 24, 94-89.
“Defense will once again be the key for us to slow down Tropa and pick up a win, because it would be difficult to engage them in a high scoring contest,” giit ni Black, na naka-grand slam noong 1989 nang nasa San Miguel Beer pa.
“We are up against an experienced and talented team in TNT so we will have to play at a high level,” hirit ni Black, na nais talunin ang Tropang Texters para maputol ang three-game losing skid, na ang huli ay ang 90-89 pagkatalo sa Barangay Ginebra noong nakaraang Linggo.
Babangon din ang Elasto Painters laban sa Hotshots na may dalawang panalo sa kanila ngayong season o sapul nang i-trade sina Paul Lee at James Yap sa offseason. Nakauna ang Star noong Disyembre 18, 99-91, at sinundan pa nitong Mayo 6, 99-93. Bukod dito, galing din ang Rain or Shine sa dalawang sunod na pagkatalo na ang pinakahuli ay sa TNT KaTropa.
“They have a cohesive team both on offense and defense we just have to limit our turnovers for us to to have a chance for an upset,” sabi naman ni Elasto Painters coach Caloy Garcia. Ang Hotshots ang pinakamainit na koponan sa kasalukuyan dahil mayroon itong limang sunod na panalo.
Samantala, pinatalsik ng Globalport Batang Pier ang Alaska Aces, 107-106, sa kanilang knockout game Linggo ng gabi sa Mall of Asia Arena sa Pasay City.
Bunga ng panalo, makakaharap ng Globalport ang top seed Barangay Ginebra sa kanilang quarterfinals matchup na magsisimula bukas.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.