Baldwin: Ateneo Blue Eagles mahihirapan sa La Salle Green Archers

MAKALIPAS ang walong taon ay muling maghaharap ang matinding magkaribal na Ateneo de Manila University Blue Eagles at De La Salle University Green Archers para sa korona ng University Athletic Association of the Philippines (UAAP) men’s basketball.

Ito ay matapos hubaran ng Ateneo ng korona ang Far Eastern University Tamaraws sa pagtakas ng 69-68 overtime win Miyerkules upang okupahan ang natitirang silya sa finals ng UAAP Season 79 men’s basketball tournament at itakda ang muling pakikipagharap sa La Salle para sa titulo.

Huling nagsagupa ang  Blue Eagles at Green Archers noong 2008 kung saan inuwi ng Ateneo ang ikaapat nitong titulo kontra sa nagtatanggol na kampeong La Salle sa pagwawalis sa serye sa loob ng dalawang laro.

Subalit malaking kaibahan ang sitwasyon ngayon ng La Salle kumpara sa Ateneo kung saan aminado si Ateneo coach Tab Baldwin na inaasahan na nilang mahihirapan ang kanyang koponan sa unang tumuntong sa kampeonato at sariwa sa mahabang pahinga na La Salle.

“Undoubtedly, La Salle has been ready and just waiting for the winner of the semifinals, and for us. I know they had been watching us and has been preparing for whoever takes the last seat. They are a good team and we are looking forward to meeting them in so short time,” sabi ni Baldwin.

Dagdag pa sa matinding problema ni Baldwin ay ang kundisyon ng kanyang mga inaasahang manlalaro tulad ni Blue Eagles center Isaac Go.

“Some of my players must recover in time for the finals,” sabi ni Baldwin.

“I know how hard they had played out there which they must do for us to make it to the finals. How I wish the physicality will not take its toll in our next game,” paliwanag pa ni Baldwin.

Matatandaang kahit na dumudugo ang ilong ay napilitang ipasok ni Baldwin ang sentro na si Go na nagawang ihulog ang bukod tanging field goal sa dagdag na limang minuto upang hatakin ang Blue Eagles sa panalo. Tumapos si Go bitbit ang double-double na 12 puntos at 14 rebounds.