Ai Ai kinampihan si Bossing: Siya ang hari ng MMFF, tapos biglang nawala!

VIC SOTTO AT AI AI DELAS ALAS

SINANG-AYUNAN ni Ai Ai delas Alas ang sentimyento ng ka-loveteam na si Vic Sotto sa hindi pagkakapili ng movie na “Enteng Kabisote 10 & The Abangers” ngayong filmfest. Gaya niya, naging festival favorite din ang Comedy Queen dahil sa “Ang Tanging Ina” series niya.

“Ako naman, nirerespeto ko ang desisyon nila. Pero kasi ano ito, eh, sana ‘yung dating pinag-usapan, four indies and four mainstream movies, mas magiging maganda.

“Kasi Christmas is for the children eh. Tsaka sanay tayo na ang palabas pag Metro Manila Filmfest ay pambata ‘yung iba.

“Para kumbaga fair din at equal rights, sana, apat na indie at apat na mainstream, which is ‘yung ibang mainstream, pambata,” paliwanag ni Ai Ai.

Batid niyang may mga festival din ang indie movies, “So marami siyang oras at marami siyang time na maipalabas. Tayo kasi nakasayanan natin na pag Metro Manila Filmfest, ‘yung ibang movie, pambata.

“Nandiyan si Bossing. Hindi yan nawawala. Si Bossing ang Hari ng Metro Manila Film Festival. Sina Vice (Ganda), parating ‘yan ang kasali.

“Parang ngayon, nag-iba lang. ‘Yun talagang kasali everytime, wala na ngayon. Nakakapanibago. Sana next time, para maging fair, ‘yung apat-apat,” diin ng Comedy Queen.

Madalas na kapag may entry si Ai Ai sa festival, agad-agad siyang lumilipad patungong Amerika upang doon idaos ang Pasko kasama ang lahat ng mga anak. This time, uuwi sa bansa sina Sofia at Nikki upang dito naman mag-celebrate ng Christmas!