Luis ayaw tantanan ng mga taong walang magawa sa buhay

LUIS MANZANO

SIGURO naman, ngayong nagpa-drug test na uli si Luis Manzano, ay tatantanan na siya ng mga mapaghanap ng butas na hindi sapat ang jingle lang bilang sukatan ng kawalan ng droga sa katawan.

Ipinipilit kasi nu’n ng iba na sa ibang bansa ay dugo at buhok ang ginagamit sa pagpapa-drug test, kaya para matapos na ang pangunguwestiyon sa kanya, buhok ang ginamit ni Luis sa ikalawa niyang pagsailalim sa drug test.

Gaya rin nang dati ang resulta, negatibo ang aktor sa droga, hindi niya naman ‘yun ipinagmamayabang pero gusto niyang ipaabot sa publiko na negatibo ang naging resulta ng ikalawa niyang drug test.

May mga bulung-bulungan kasi nitong mga huling panahon na kasama ang pangalan ng aktor sa listahan ng mga artistang gumagamit ng ipinagbabawal na gamot.

Pero kaya nga tinawag na haka-haka lang ay dahil walang kahit sinong makapagkukumpirma ng balita.

Mabuti na ring sumailalim uli sa drug test si Luis Manzano na buhok ang ginamit niyang specimen, wala na sigurong masisilip pa ang iba ngayon laban sa kanya, maliban na lang kung talagang gusto siyang buwisitin ng mga taong walang magandang pinagkakaabalahan sa buhay.