Star Hotshots ginapi ang Globalport Batang Pier sa overtime

Mga Laro sa Miyerkules
(Araneta Coliseum)
4:15 p.m. Mahindra vs San Miguel Beer
7 p.m. NLEX vs Barangay Ginebra

KINAILANGANG dumaan sa overtime ng Star Hotshots para malusutan ang Globalport Batang Pier, 105-102, at makubra ang unang panalo sa kanilang 2016 PBA Governors’ Cup elimination round game kahapon sa Smart Araneta Coliseum sa Cubao, Quezon City.

Bumida para sa Star si RR Garcia, na nagtala ng team-high 26 puntos, na umiskor ng isang floater para itabla ang laro sa 92-all sa regulation at naghulog ng krusyal na dalawang free throws para ibigay sa Hotshots ang 104-102 bentahe may 8.4 segundo ang nalalabi sa overtime.

May pagkakataon sana ang Batang Pier na ipanalo ang laro sa huling 3.7 segundo ng ikaapat na yugto subalit nabitawan ni Terrence Romeo ang bola habang tumitira mula sa 3-point area.

Kumana ng double-double si Marqus Blakely sa ginawang 24 puntos at 22 rebounds, si Peter June Simon ay nag-ambag ng 15 puntos at si Mark Barroca ay nagdagdag ng 11 puntos para sa Star, na umangat sa 1-2 karta.

Pinamunuan ni Michael Glover ang Globalport sa itinalang 27 puntos, 12 rebounds at 5 assists.

Si Romeo ay kumamada rin ng 27 puntos habang sina Stanley Pringle at Joseph Yeo ay nagdagdag ng 20 at 11 puntos para sa Batang Pier. Si Yousef Taha ay nag-ambag ng 10 puntos at 13 rebounds para sa Globalport na nahulog sa 0-3 kartada.